Gözlərimin işığında. şerlər

Vahid Çəmənli

Vahid Çəmənli son bir neçə ay ərzində yazdığı yeni şerlər toplusu ilə yenə də görüşünüzə gəlmişdir. Öz kitabını «Gözlərimin işığında» adlandıran müəllif, hər şerin üstündə gözlərinin nurunu qətrə — qətrə sərf etdiyinə, hər sözə, hər misraya böyük zəhmət sərf etdiyinə işarə edir.Vahid Çəmənli əmindir ki, bu şerlər kitabı oxucular tərəfindən sevinclə qarşılanacaq, sevilə — sevilə oxunacaq.

Qəzəl

Aşiqi məst edər ülfət, meyə nə hacət olur?

Mey olan yerdə könül, meyçiyə itaət olur.

Qədərindən də əzizdir mənə hikmət dolu söz,

Söz əgər qəlbə yatırsa, ürəyim rahət olur.

Dürlü söz axtarıram dəryada ya düzdə ola,

Gəzərəm, baxmaram, billahi neçə saət olur…

Qoyma əğyarı gələ, könlünü bərbad eliyə,

Əğyarın qəlbi qara, gördüyü iş qarət olur.

Bu da bir sirri-xudadır, iki qəlb olsa yaxın,

Vahida, dadlı, şirin söhbət olur, ülfət olur.

12.10..2018