Su üzərində bahar

Rəfail Alı oğlu Tağızadə

Kitabda şair, Rəsul Rza mükafatı laureatı Rəfail Tağızadənin şeirləri, «Adam Mitskeviçin xatirəsinə on nəğmə» və «Qara-qırmızı Xocalı» (Muğam üstündə oxunan ağı) poemaları yer alıb.

Məndən bİr xalı toxu

Məndən bir xalı toxu

sözünün ilməsindən,

içinə bir qara qat

gözünün sürməsindən.

Naxışları bol eylə

sevdiyin güllərindən,

qızılgülün ləçəyi

asılsın tellərindən.

Önümə bir yol uzat,

durub, yeriyim gedim,

saçını tök üzümə,

öpüm, darayım gedim.

04.11.2012